गुनाट एकनाथ थोरात
इनामगाव (ता.शिरूर) जिद्द ,चिकाटी आणि अभ्यासातील सातत्याच्या जोरावर काहींनी अत्यंत प्रतिकूल परिस्थितीवर मात केली,तर काहींनी कुटुंबीयांचे स्वप्न साकारले . सातत्यपूर्ण प्रयत्नांना यश येते , हे सनदी लेखापाल परीक्षेतील यशस्वितांनी दाखवून दिले आहे.कष्टाची तयारी ठेवल्यास आयुष्यात काहीही अशक्य नसते , असा संदेशच जणू त्यांनी आपल्या यशातून दिला आहे .
पारंपारिक शेती हाच व्यवसाय असलेले शशिकांतचे वडील दत्तात्रेय व आई सुनंदा हे हाडाचे शेतकरी असून, वडीलोपार्जीत जमीन कसूनच ते प्रपंचाचा गाडा पुढे ढकलत आहेत. शशिकांत यांचे थोरले बंधू कुलदीप खासगी कंपनीत कामाला असून, त्यांनी तसेच चुलते कैलास यांनी शशिकांतला सीए होण्यासाठी सर्वतोपरी मदत केली. शिरूरला चुलत्यांकडे राहुन शशिकांत ने जिद्दीने सीए परीक्षेचा अभ्यास केला. या दरम्यान, चरितार्थासाठी व सीए परीक्षेच्या अभ्यासासाठीच्या खर्चाचा भार घरच्यांवर पडू न देता शिरूरमधेच छोटी - मोठी कामे केली. काही छोट्या दुकानांतही ते कामाला होते. पाच वर्षे महाविद्यालयीन विद्यार्थ्यांसाठी त्यांनी क्लासही घेतले.
सनदी लेखापाल होण्यास शिरूर येथील सीए सुनिल यल्लोळ यांचे त्यांना मार्गदर्शन लाभले. सहायक पोलिस निरीक्षक हनुमंत ढवण, पोलिस उपनिरीक्षक तुषार भोर, शिवाजी आव्हाड, प्रा. योगेश भुजबळ, प्रा. सुधीर शिंदे, विकास चत्तर, किरण घाडगे या सहकाऱ्यांनीही वेळोवेळी प्रेरणा, प्रोत्साहन देताना सर्वतोपरी सहकार्य केले. इनामगाव परिसरात पहिला सीए होण्याचा मान शशिकांत घाडगे यांनी मिळविला असून, एका शेतकऱ्याचा मुलगा सीए झाल्याने त्यांच्यावर सर्वत्र अभिनंदनाचा वर्षाव होत आहे.