शिक्रापूर : प्रा.एन.बी. मुल्ला
सावित्रीबाई फुले पुणे विद्यापीठाच्या नोंदणीकृत पदवीधरांच्या अधिसभा (सिनेट ) कार्यकारणीची निवडणूक नुकतीच जाहीर झाली असून रविवार (दि.२० नोव्हेंबर) रोजी प्रत्यक्षात मतदान प्रक्रिया संपन्न होणार आहे.
सावित्रीबाई फुले पुणे विद्यापीठाच्या सिनेट निवडणूकीसाठी खुल्या वर्गाच्या ५ जागांसाठी १८ उमेदार, इतर मागासवर्गीय प्रवर्ग १ जागेसाठी ४ उमेदवार, अनुसूचित जाती १ जागेसाठी ४ उमेदवार, अनुसूचित जमाती १ जागेसाठी ५ , भटक्या विमुक्त जाती जमाती १ जागेसाठी ४ व राखीव महिला १ जागेसाठी २ अशे एकूण १० जागेसाठी ३७ उमेदवार निवडणूक रिंगणात आहेत. पुणे, अहमदनगर, नाशिक या तीन जिल्ह्यातील पुणे विद्यापीठाचे पदवीधर मतदार संघाचे एकूण ८८ हजार मतदार असून पुणे विद्यापीठ अधिसभा (सिनेट) निवडणूक २० नोव्हेबर रोजी होणार आहे. तीन जिल्ह्यांतील मतदार असल्यामुळे उमेदवारांना मतदारांपर्यंत पोहचण्यासाठी दमछाक होणार आहे. या निवडणुकीसाठी साधारण पॅनेलच्या माध्यमातून तिरंगी लढत होण्याची शक्यता वर्तवली जात आहे. प्रामुख्याने प्रथमच या निवडणुकीत राजकीय विरहीत विविध सामाजिक संघटना , सामजिक संस्था यांचा पाठींबा मिळवत छत्रपती शाहू महाराज पॅनेलने प्रवेश केल्याने निवडणूक रंगतदार होणार असल्याचे चित्र आहे. छत्रपती शाहू महाराज पॅनेल मधून खुल्या जागेसाठी सुनील खंडेराव दळवी व वाहीद कासम शेख, ओबीसी प्रवर्गातून मयुर तुकाराम भुजबळ, एससी प्रवर्गातून शशिकांत महादेव तीकोटे, एसटी प्रवर्गातून देवराम चिमाजी चपटे, एनटी प्रवर्गातून अमोल बाबासाहेब खाडे हे उमेदवार निवडणूक रिंगणात आपले नशीब आजमवणार आहेत. विशेष म्हणजे हे पॅनेल कोणत्याही राजकिय पक्षांशी संबंधित अथवा जोडलेले नाही. सर्वच पॅनेलचे उमेदवार मतदारांच्या वैयक्तिक गाठीभेटीवर भर देत असल्याचे चित्र पहावयास मिळत आहे. विशेषतः उमेदवारांना सर्व मतदारापर्यंत पोहचणे शक्य होणार नसल्याने या निवडणुकीत सोशल मिडियाद्वारे प्रभावीपणे प्रचारयंत्रणा राबविली जाण्याचीही शक्यता आहे.
