रांजणगाव गणपती संभाजी गोरडे
दुर्गजागर प्रतिष्ठानकडून मालेगाव ( नाशिक ) येथील किल्ले गाळणा मुख्य दरवाजावर महाव्दार अर्पण सोहळा साजरा करण्यात आला. हा अविस्मरणिय सोहळा याची देही, याची डोळा पारणे फेडण्यासारखा अद्भूतप्रकारे पार पडला.
किल्ले गाळणाला महाव्दार बसवून त्याचे वैभव परत करण्याचे काम आज दुर्गजागर प्रतिष्ठानने केले आहे. सह्याद्रीच्या या शिलेदाराच्या शेल्यात आणखी एक मानाचा तुरा शोभला आहे. दुर्गजागरचा हा सोहळा खूप सुंदर झाला. गडावर रात्री देव देवतांचा जागर गोंधळ घालण्यात आला, तसेच गावभर ढोल ताश्यांच्या गजरात व शिवराय व मावळ्यांच्या पात्रांसह गावभर शिवप्रतिमेची पालखीत गावभर मिरवणूक करण्यात आली. भंडार उडवून, शिवरायांचा जयघोष करून दाहीदिशांना साक्षी ठेवून हा सोहळा अविस्मरणिय केला. यासाठी झटणाऱ्या व निधी देणाऱ्या प्रत्येक हातांचा दुर्गजागर प्रतिष्ठान ऋणी राहिल असे संतोष जगताप यांनी सांगितले.