पुणे जिल्हा प्रतिनिधी
नवी दिल्ली येथील साखर महासंघाचे राष्ट्रीय अध्यक्षपद माजी मंत्री हर्षवर्धन पाटील यांना दिल्याने आम्हाला इथे सगळे मोकळे झाले असे कोणीही समजु नये असा अप्रत्यक्ष इशारा बारामती करांना राजवर्धन पाटील व अंकीता पाटील (ठाकरे) यांनी पत्रकार परिषेदेच्या माध्यमातुन दिला आहे.
आम्ही पूर्वी महाआघाडीत होतो आता महायुतीमध्ये आहेत. आघाडीत असताना तीन ही वेळेस त्यांनी आमची फसवणूक केलेली असून,आमच्या पाठीत खंजीर खुपसला आहे. त्यामुळे जे विधानसभेला आमचे काम करतील, त्यांचेच काम आम्ही लोकसभेला करू तसेच २०२४ ची विधानसभा आम्ही लढणारच आहेच असे राजवर्धन पाटील यांनी स्पष्ट केले. बारामती लोकसभा मतदारसंघामध्ये भाजप, राष्ट्रवादी आणि शिवसेना यांचा उमेदवार जो असेल त्याचेच काम करावे लागेल, असे सातत्याने म्हणणारे राज्याचे उपमुख्यमंत्री अजित पवार यांच्या पत्नी सुनेत्रा पवार यांनाच जवळपास उमेदवारी निश्चित झाली आहे. मात्र, पाटील भावंडांच्या या दाव्यामुळे बारामती मतदारसंघात महायुतीत सर्व काही आलबेल नसल्याचे स्पष्ट झाले आहे.
खासदार सुप्रिया सुळे यांनी जर तुम्हाला विधानसभेला मदत करतो असा शब्द देत लोकसभेला मदतीचे आवाहन केले तर काय करणार या वेळेस बोलताना राजवर्धन पाटील म्हणाले की, ते सन २००९पासून केवळ शब्दच देत आले आहेत.शब्दाला प्रत्यक्ष कृतीची जोड हवी. त्यांनी आत्ताच त्यांची भूमिका जाहीर करावी. तसेच निवडणुकीस आणखी बराच वेळ आहे, असे म्हणत राजवर्धन पाटील यांनी स्पष्ट केले की, जर उपमुख्यमंत्री अजित पवार गटाला लोकसभेची उमेदवारी मिळाली, तर आम्ही आमच्या कार्यकर्त्यांचा मेळावा घेणार आणि त्यामध्ये आमची भूमिका स्पष्ट करणार. कारण यापूर्वी अनेकवेळा यांनी शब्द देऊन फिरविला आहे. त्यामुळे या वेळेस आम्ही या कोंडी मध्ये फसणार नाही. त्यामुळे उमेदवार जाहीर झाल्यानंतर पुढील भूमिका घेऊ, असेही अंकिता पाटील व राजवर्धन पाटील यांनी पत्रकार परिषदेत सांगितले आहे.